Actuals
miembros de l'Academia
|
|
MIGUEL
ÁNCHEL BARCOS CALVO
Miembro
numerario dende octubre de 2014. Natural de Fago, en a Val
d'Ansó, ye parlador d'o dialecto ansotano. Diplomau en machisterio. Ha militau
en diferents asociacions ta la esfensa y promoción de
l'aragonés. Ye lexicografo y traductor. Ha impartiu cursos sobre cultura y luenga aragonesas.
|
|
FERNANDO BLAS GABARDA
Miembro numerario
dende octubre de 2022. Natural de Zaragoza, ha investigau las diferents
parlas aragonesas sobre lo terreno. Chunto con Fernando Romanos van
crear l'Archivo Audiovisual de l'Aragonés, un importantismo repositorio
de gravacions a parladors nativos, y van publicar una serie de
diccionarios, libros y articlos, d'os que beluns son obras clau d'a
lexicografía aragonesa. A destacar: Fraseología del Chistabín, El aragonés de Baixo Peñas, Diccionario Aragonés: Chistabín-Castellano.
|
|
|
MANUEL
CASTÁN ESPOT
Miembro
fundador de l'E.F.A. Filologo y profesor de secundaria. Ye natural de
Gabás, en a Vall de Benás. Va presidir Chuntos por l'Aragonés,
asociación que va promover la cilebración d'el II Congreso de
l'Aragonés. Esfensor d'el suyo dialecto local, lo benasqués u patués,
va estar president de l'EFA dende octubre de 2006 dica chunyo de
2021. Ye miembro de l'Academia Aragonesa de la Lengua dende la suya
fundación en 2021.
|
|
CHORCHI
DÍAZ GÓMEZ
Miembro
numerario dende octubre de 2014. Natural de Zaragoza, ye
licenciau en Filolochía Hispanica y un important
coneixedor d'el dialecto benasqués, ademés
d'haber investigau en profundidat las parlas ribagorzanas,
tanto catalanas como aragonesas; ye profesor de secundaria y
treballa activament en movimientos de renovación
pedagochica d'Aragón.
|
|
JUAN
JOSÉ GUILLÉN CALVO
Miembro
d'Honor de l'E.F.A. dende noviembre de 2007. Doctor en
filolochía anglesa, ha feito importants estudios sobre
toponimia y antroponimia d'a Val de Tena y ye buen conoixedor
d'a etnografía local. Tamién ye responsable de
publicacions sobre filolochía anglesa. Ye natural de
Pandicosa.
|
|
XABIER
KINTANA URTIAGA
Miembro
d'Honor de l'E.F.A. dende marzo de 2009. Conoixito escritor
en luenga basca, ha treballato en una prolifica obra que
pendula dende a poesía enta l'asayo, pasando per a
narrativa u as biografías. Ye muito important a suya
producción como traductor. En l'actualidat ye
Secretaire d'Euskaltzaindia y ha participato en diferents
eventos relacionatos con a luenga aragonesa.
|
|
JUAN
JOSÉ LAGRABA MIGUEL
Miembro
fundador de l'E.F.A. Ye escritor en cheso, lo suyo
dialecto local, y ha feito firme ceprén en a suya
promoción tamién dende o Gurpo
Folklorico Val d'Echo
y dende l'asociación Bisas de lo Subordán. Ye
coautor, chunto con Chusé Lera, d'a Gramatica de lo
cheso.
|
 |
DABI
LAHIGUERA ALBERICIO
Miembro
numerario dende octubre de 2023. Natural de Zaragoza, ye
fisico de
formación y profesor de tecnolochía de profesión. Ha
participau en
o movimiento de defensa de l’aragonés dende los 17 anyos, an
que
ha desarrollau, entre muitos otros, treballos de difusión d’a
lengua, ensenyanza y treballos d’investigación, especialment
sobre
aragonés residual, centrando-se en a comarca de Moncayo.
Tamién ha colaborau en prensa escrita y ye
autor de poesía y relatos.
|
|
CHUSÉ
LERA ALSINA
Miembro
fundador de l'E.F.A. Ha treballau firme por a esfensa y
promoción de l'aragonés, dende o dialecto cheso
que ha cautivau y estudiau, fendo composicions literarias,
liderando lo Grupo Folklorico Val d'Echo y publicando
articlos y libros, beluns tant importants como a Gramatica de
lo Cheso, u o diccionario Aplego. Conoixito en toda la
sociedat aragonesa por estar l'autor d'a popular canta S'ha
feito de nuey. Tamién ha impartiu cursos
d'aragonés.
|
 |
LUCIA LÓPEZ MARCO
Miembro
numerario dende octubre de 2023. Ye licenciada en Veterinaria, máster
en Agroecolochía, Desembolique Rural y Agroturismo, y máster en
Periodismo y Comunicación Cientifica. Ye divulgadera de temas agrarios,
ambientals y rurals, y autora d'o blog mallata.com. D'a suya obra literaria cal destacar o Premio Arnal Cavero, que li concedió lo Gubierno d'Aragón en 2023, por o suyo poemario Cuan plegue o colapso.
|
|
CHABIER
LOZANO SIERRA
Miembro
fundador de l'E.F.A. Licenciato en filolochía, ha
publicato estudios sobre diferents dialectos locals
aragoneses. Treballa en a promoción d'o belsetán,
dialecto que ha feito propio dende que marchó a residir enta Bielsa y d'o
que n'ha publicato una important morfosintaxi (chunto con
Ánchel L. Saludas). Ye miembro de l'asociación
Fendo Tranya. Ye president de l'EFA dende chunyo de 2021.
|
|
JUAN
PABLO MARTÍNEZ CORTÉS
Miembro
numerario dende octubre de 2014. Ye Doctor Incheniero de
Telecomunicación y Profesor Titular d'a Universidad de
Zaragoza. Participa en prochectos de difusión,
dinamización y revitalización lingüistica
de gran alcanz, relacionaus con l'uso de l'aragonés en
as nuevas tecnolochías (creación y difusión
de contenius libres, localización de software,
ensenyanza a distancia) y o desarrollo de ferramientas
de lingüistica computacional, d'as que se'n destaca un
corrector ortografico y un traductor automatico. Ye miembro de l'Academia Aragonesa de la Lengua dende la suya fundación en 2021.
|
|
FELICIANO
MARTÍNEZ TUR
Miembro
numerario de l'E.F.A. dende marzo de 2013. Se va criar a
Eivissa y vive en Zaragoza dende 1990. Licenciau en
Filolochía Hispanica, ha feito parti de diferents
asociacions en a promonión d'a nuestra luenga. Cal
destacar a suya fayena como profesor d'aragonés en un
gran numbro de cursos y como redactor de materials
d'amostranza. Ye coautor d'o manual d'amostranza Arredol,
una gambadeta por a luenga aragonesa.
|
|
MICHAEL
METZELTIN
Miembro
d'Honor de l'E.F.A. dende abril de 2008. Ye catedratico de
Lingüistica y Didactica d'as Luengas Romanicas d'a
Universidat de Viena. Autor d'importants obras sobre
lingüistica y romanistica, ha colaborato dende fa
tiempos en muitos eventos relacionatos con a luenga
aragonesa. A suya obra més conoixita ye Lexikon der
Romanistichen Linguistik. Ye natural de Sorengo (Suiza)
|
|
Mª
TERESA MORET OLIVER
Miembro
numerario dende octubre de 2014. Natural de Mequinenza, ye
doctora en Filolochía Hispanica, conoixedera d'as
parlas aragonesas y important investigadera d'as parlas
catalanas d'Aragón, asinas como d'as parlas de
transición. Ye vinculada profesionalment a la
Universidad de Zaragoza y ha treballau en docencia de luengas
en secundaria y en escuelas oficials d'idiomas. Ye miembro de l'Academia Aragonesa de la Lengua dende la suya fundación en 2021.
|
|
BRIAN
MOTT
Miembro
d'Honor de l'E.F.A. dende noviembre de 2007. D'orichen
londinense, ye doctor en filolochía anglesa y
treballa a la Universitat Central de Barcelona, a on ye
Coordinador d'a Sección de Filolochía Anglesa.
Ha estudiau lo dialecto chistabín dende 1968, y ye
responsable d'un buen amiro de publicacions sobre iste
dialecto y tamién d'atros dialectos aragoneses y
catalans en territorio aragonés. Antiparti, ha
publicau treballos relacionaus con a filolochía
anglesa sobre fonetica, fonolochía, semantica,
pragmatica, gamatica y traducción.
|
|
SANTIAGO
PARICIO MARTÍN
Miembro
numerario dende octubre de 2014. Ye licenciau en Filolochía
Hispanica, en Filolochía Catalana y master en Luengas
Aplicadas. Treballa como profesor de secundaria. Ha
desarrollau treballos d'investigación dialectal y
ferramientas de lingüistica computacional. D'a suya
fayena literaria s'ha de destacar o premio Arnal Cavero que
li concedió lo Gubierno d'Aragón en 2009 a la suya
obra Fillos d'as luengas. Misión Multilingüismo.
|
|
ANTONIO
PLAZA BOYA
Miembro
numerario dende noviembre de 2007. Ye natural de Castilló
de Sos y parlant de benasqués. Director d'o Seminario
de Balbastro y profesor de filolochía anglesa en a
UNED. A suya obra escrita tracta sobre a luenga y as
tradicions de l'Alto Esera y d'a Vall de Benás.
|
|
ARTUR
QUINTANA I FONT
Miembro
d'Honor de l'E.F.A. dende noviembre de 2007. Prestichioso
estudioso d'es parlars catalans en Aragón, ye miembro
correspondient de l'Institut
d'Estudis Catalans.
Ha estudiato l'aragonés testimonial d'a Val d'o
Mezquín, y mes recientment, l'aragonés de
Sercué, en Vallibió. Exerció lo suyo
machisterio, dica la chubilación, en a Universidat de
Heidelberg. Amés de presidir a Iniciativa
Cultural de la Franja,
ye miembro d'o Consello
d'a Fabla Aragonesa
y d'o suyo Consello Asesor. Lo 27 de febrero de 2023 va estar nombrau academico d'honor per l'Academia Aragonesa de la Lengua.
|
|
RUBÉN RAMOS ANTÓN
Miembro
numerario dende octubre de 2022. Natural de Zaragoza, ye periodista y
escritor. Ye autor de buena cosa d'articlos en aragonés en diferents
medios y ha participau en programas radiofonicos. Ha ganau lo Premio
Arnal Cavero en as edicions de 2006 y 2008.
|
|
FRANCHO
RODÉS ORQUÍN
Miembro
fundador de l'E.F.A. Licenciato en filolochía, ha
publicato libros y estudios relacionatos con diversos
dialectos aragoneses y con a estandardización d'a
luenga. Estió miembro d'o Consello Asesor d'o I
Congreso ta ra Normalización de l'Aragonés.
Fa parte d'o Rolde O Caxico de Samianigo. Dica la suya retreta s'adedicó a l'amostranza secundaria. Ha
impartito cursos d'aragonés ta toda mena de livels reglaus y no reglaus. Ye miembro de l'Academia Aragonesa de la Lengua dende la suya fundación en 2021.
|
|
FERNANDO
ROMANOS HERNANDO
Miembro
fundador de l'E.F.A.. Autor de meyos audiovisuals, con
gravacions de campo que representan a toz es dialectos de
l'aragonés, ha escrito una important obra literaria;
pero destaca especialment por a investigación
dialectolochica que queda patent en una important producción
de vocabularios, descripcions gramaticals y fraseolochía.
Estió fundador d'o Ligallo de Fablans y ye miembro d'o
Consello d'a Fabla Aragonesa y d'o suyo Consello Asesor.
Anque zaragozano de naiximiento, ye chistabín
d'adopción y ha estudiau lo dialecto local dende
antigo. Ye profesor de secundaria y d'a Universidad de Zaragoza. La suya tesi doctoral versa sobre lo cheso.
|
|
ÁNCHEL
LOIS SALUDAS BERNAD
Miembro
fundador de l'E.F.A. Natural d'Espierba (en a Val de
Bielsa), ye o mes important estudioso d'o dialecto belsetán,
d'o que n'ha publicato una important morfosintaxis (chunto
con Chabier Lozano), y viene arreplegando lo lexico d'o suyo
dialecto dende fa muitos anyos. Ye miembro d'o Consello d'a
Fabla Aragonesa. Tamién ha publicato una interesant
obra literaria dialectal.
|
|
FERNANDO
SÁNCHEZ PITARCH
Miembro
fundador de l'E.F.A. Licenciau en Ciencias Quimicas y en
Filolochía Hispanica, treballa como profesor de
secundaria. Destacau empentador de l'asociacionismo en
esfensa de l'aragonés, ye miembro d'o Consello d'a
Fabla Aragonesa y de Nogará-Religada. Ha investigau
especialment es dialectos chistabín, fovano, agüerano
y campés. Ye autor d'importants monografías
sobre morfosintaxi y lexico dialectals.
|
|
JOSÉ
Mª SATUÉ SANROMÁN
Miembro
fundador de l'E.F.A. Natural d’Escartín
(Broto), en as montanyas de Sobrepuerto. Estudió
Machisterio, se licenció en Filosofía y Letras
(Historia) y ha treballau siempre de mayestro. Ha replegau y
estudiau toda la cultura tradicional (costumbres, creyencias,
luenga) d’a suya tierra, dando notorio d’ella en
distintas publicacions, en castellano y aragonés. En a
luenga de Sobrepuerto (a suya luenga materna) ha publicau un
vocabulario con eixemplos d’emplego, as charradas que
os lolos contaban en as veiladas y os quefers de toda
l’anyada. Dende 2007 colabora con Heraldo de Aragón, aón que publica la columna Carasol aragonés, con escritos
costumbristas en aragonés.
|
|
JUAN
JOSÉ SEGURA MALAGÓN
Miembro
fundador de l'E.F.A. y Miembro d'Honor dende chunyo de 2021. Licenciau en Ciencias Fisicas, estió
catedratico de secundaria en Zaragoza dica la chubilación. Ha feito estudios
sobre teoría lingüistica, codificación y
aspectos morfolochicos y sintacticos. Fació parti d'a
Comisión asesora d'o prochecto lexicografico Tresoro
d'a Luenga Aragonesa. Ye miembro d'o Consello d'a Fabla
Aragonesa y de Nogará-Religada.
|
|
LOIS CHABIER TEJADA FRANCIA
Miembro
numerario dende octubre de 2022. Natural de Zaragoza, ye licenciau en
Filolochía Hispanica, profesor de secundaria,
escritor, investigador y editor. Ha ganau
importants premios literarios, como lo Val d'Echo u lo Billa de
Sietemo. Autor d'un treballo d'investigación inedito sobre o sustrato
aragonés en Morata de Jalón (Zaragoza). Ha dau clases d'aragonés en
Balbastro, Monzón y Zaragoza.
|
|
GUILLERMO
TOMÁS FACI
Miembro
numerario dende octubre de 2014. Natural de Zaragoza, ye doctor en Historia, con una tesi doctoral sobre
Ribagorza; antiparte d'una impecable trachectoria como
investigador, ye gran conoixedor de l'aragonés medieval
y d'as parlas aragonesas modernas. Ye funcionario d'o Cuerpo Facultativo de Archiveros del Estado.
|
|
QUINO
VILLA BRUNED
Miembro
fundador de l'E.F.A. Natural de Chistén, en a Val
de Chistau, va ser un pionero en a producción de cine
etnografico en a nuestra luenga. Mayestro, psicologo
clinico y sexologo. Va treballar en educación secundaria basta la retreta. En chistabín
cautiva lo rilato, la poesía y la novela; tamién
escribe narrativa y asayo en castellano. Ha realizau bellas
200 obras de cine amateur y video, d'ellas mas de 60 de tipo
etnografico. Dende 1978 ye treballando en una ampla obra de
tradición oral d'a Val de Chistau.
|
|
|
Lo
Consello de Gubierno
|
L'actual Consello de Gubierno
d'o Estudio de Filolochía Aragonesa (Academia de l'Aragonés) eslechito lo 7
d'octubre de 2024, ye formato por:
President: Dabi Lahiguera Albericio
Vicepresident: Rubén Ramos Antón
Secretario: Chorchi Díaz Gómez
Tresorera: Lucia López Marco
Vocals: Chusé Lera Alsina, Francho Rodés Orquín, Fernando
Romanos Hernando y Guillén Tomás Faci
|
|
|
Lo miembro de l'EFA Juan José Lagraba Miguel estié lo tresorero de
l'asociación dende lo primer Consello de gubierno, en 2006, hasta que
pasé lo testigo en 2024. Con ixa enchaquia, facié esta obra poetica que
reproducimos aquí en agradeiximiento por lo triballo feito y la
permanent actitut positiva d'un amigo bien queriu por toz.
DESPEDIDA DE LO
CONSELLO DE GUBIERNO DE L’EFA
'Parco en
parola, xuto en ideyas,
viello canoso,
mudo Cantaire,
pasau lo
tiempo rodiau de sabios
con vara fina,
como un pelaire.'
Yera pasau lo
dos mil
cuando en
Aragón nacié
lo movimiento
clamau
Chuntos por
l'Aragonés.
D'alto enta
baixo clameron
a qui yera
menester
pa
rechuntar-nos a todos
en un congreso
dimpués.
D'ixe segundo
congreso
una academia
nacié
en do, sin
muit bien saber-lo,
calau en
dentro me vie...
S'empecipié a
triballar
dimpués de lo
dosmil seis.
Se metié muito
triballo,
muito tiempo
se metié...
Sinde peliar,
barallemos
con lo que hébanos
a fer
y s’acotracié
una norma
d'escribir
l'Aragonés,
la 'Propuesta
Ortografica'
que se
publiqué dimpués.
Y s’agrandé l'Academia,
enamplada con
mas chent;
que buena
falta li feba,
ya que, bi ha
qui, li se'n fue.
Y con la chent
remozada
y muitas horas
dimpués
de triballar
como chinos
lo chuco
l'aragonés,
en lo dos mil
ventiuno
la Gramatica
nacié...
Y acucuta ya
lo DORTO,
de la mano de
Rodés...
Segura que se
chubila,
Lera que se
chubilé,
Castán que
emplea descanso.
Y menda, pos
que vo a fer?
Lo millor ye
que los chóvens,
que son qui fa
mas quefers,
leven lo ganau
ta puerto
y continen los
primers...
Como risulta tedioso
lo de rimar
con la 'e'
me vo a pasar
ta otra rima
y a mirar como
en saldré...
Los achiperres
y cuentas
vos habré que
trasvasar.
Que lo nuevo
tresorero
saba por do
empecipiar...
Yo me sinto
muit goyoso
d'haber-vos
acompanyau
estas anyadas,
ya muitas,
por lo que
m'hez amostrau.
Me seguirá
fendo goyo,
poder-vos
acompanyar
dende la
zaguera fila,
en do vos
pueda alufrar
y siguir-vos
los triballos
pa poder-los
emplegar.
Que sigaz la
referencia
en do yo pueda
mirar,
en do vos
puedan siguir
los que acuden
a estudiar
u los que
fablan encara
las variants
de los lugars.
U los que
escriben cancions
que lugo
puedan cantar
con
cualsiquier ritmo nuevo
que lis cuaque
d'emplear.
Preixinaba
l'otro día
que esto se
parez a un rap...
Si hese naciu mas
tardi
lo vos podría
cantar
con ixe ritmo
moderno
que a los chóvens
fa bailar...
A los güelos,
mas nos cuaca
una ranchera u
un vals...
A la fin, que
lo d’hoi siga
un empentón ta
debant,
una ocasión de
sintir-nos
remozaus,
estando grans!
Lo
Cantaire (Juanjo Lagraba)
|
|
|
