Academia de l'Aragonés

En 1986, a instancias d’o Consello d’a Fabla Aragonesa, s’achuntoron, amés de dita asociación, lo Ligallo de Fablans de l’Aragonés, l'Instituto de Estudios Altoaragoneses, lo Rolde d’Estudios Nazionalista Aragonés, la Chunta Unibersitaria por a Reconoxedura y a Promozión de l’Aragonés, o Rolde de Fabla Aragonesa de Chaca, y l’Asociación Alasets de Benás, a es efectos de convocar lo I Congreso ta ra Normalizazión de l’Aragonés, con l’obchectivo de crear unas normas graficas comuns ta la nuestra luenga. Finalment, lo 19 d’abril de 1987 s’apreboron as Normas Graficas de l’Aragonés en un congreso amplo e representativo, pero que no aconsiguió aplegar de plano a totas las voluntaz.

En chinero de 2005, deciueito anyadas dimpués, se tornoron a achuntar asociacions y personas en una asemblea historica celebrada en Uesca. En ixa asemblea s’aprebó lo Manifiesto por la unidad de la Lengua Aragonesa, que dimpués recibió l’adhesión de 4200 personas, 180 entidaz (asociacions, interpresas, clubs, sindicatos,...), 44 concellos, cinco comarcas y as deputacions provincials de Uesca y Zaragoza. Tamién en ixa asemblea de Uesca s’expresó la necesidat de convocar un nuevo congreso con a firme decisión de sensibilizar a la sociedat aragonesa y crear una autoridat lingüistica.

Dende ixe mesmo momento se prencipió a treballar en l’asociación Chuntos por l’Aragonés, y lo 15 de chuliol de 2006, en o II Congreso de l’Aragonés, se creó l’Academia de l’Aragonés, con l’aprebación d’as ordinacions u estatutos y lo nombramiento d’os primers miembros numerarios.

PRIMERA NOMINA DE MIEMBROS DE L'ACADEMIA:

Abril Carceller, Carlos
Gimeno Aragüés, Chusé
Benítez Marco, Pilar
Castán Espot, Manuel
Lagraba Miguel, Juan José
Latas Alegre, Óscar
Lera Alsina, José
Lozano Sierra, Chabier
Marqués Franco, Manuel
Rodés Orquín, Francho
Romanos Hernando, Fernando
Saludas Bernad, Ánchel Lois
Sánchez Pitarch, Fernando
Satué Sanromán, José Mª
Segura Malagón, Juan José
Serrano Lacarra, Roberto
Tena Puy, Ana
Vidaller Tricas, Rafel
Villa Bruned, Quino

L’Academia empecipió a funcionar con una Mesa d’Edat ta constituyir-se dimpués como asociación lo diya 9 de setiembre de 2006, baixo lo nombre de "Estudio de Filología Aragonesa". Lo primer Consello de Gubierno oficial, presidiu por Chusé Lera, estió eslechito con carácter provisional dica que o 28 d’octubre de 2006 se celebró lo primer pleno oficial en o que se decidió la estructura de funcionamiento, asinas como un nuevo Consello de Gubierno, alavez ya ta las tres anyadas que sinyalan los estatutos, baixo la presidencia de Manuel Castán.

Ixe primer Consello de Gubierno teneba la siguient composición:

President: Manuel Castán
Vicepresident: Chabier Lozano
Secretario: Fernando Sánchez
Tresorero: Juan José Lagraba

Vocal Coordinación: Mª Pilar Benítez
Vocal Codificación: Juan José Segura
Vocal Investigación: Francho Rodés
Vocal Documentación: Óscar Latas
Vocal Sociolingüistica: Fernando Romanos

Lo día 24 de noviembre de 2007, en sesión plenaria de l'Academia, prenió posesión como miembro numerario lo filologo benasqués, natural de Castilló de Sos, Antonio Plaza Boya, con o que a nomina d'Academicos pasa ta la vintena. Lo mesmo día, en homenache publico presidiu per lo Viceconsellero de Cultura d'o Gubierno d'Aragón, Juan José Vázquez, prenioron posesión d'a dignidat d'Academicos d'Honor las siguients personalidaz:

Brian Mott, doctor en filolochía y estudioso de l'aragonés (especializau en o chistabino)

Artur Quintana i Font, doctor en filolochía, correspodient de l'Institut d'Estudis Catalans y estudioso de l'aragonés (especializato en l'aragonés residual d'o Mezquín, y en l'aragonés de Vallibió)

Brian Mott, Artur Quintana, Manuel Castán, Juan José Vázquez, Nieus Luzía Dueso, Juan José Guillén y Marta Marín (qui representaba a Rosario Ustáriz)

En una nueva sesión plenaria celebrata a Samianigo lo 12 d'abril de 2008, estió proclamato Academico d'Honor lo Dr. Michael Metzeltin (en a foto d'abaixo), catedratico de Lingüistica y Didactica d'as Luengas Romanicas d'a Universidat de Viena.

En a sesión plenaria de 21 de marzo de 2009, en Zaragoza, estió proclamau Academico d'Honor o escritor Xabier Kintana, qui yera alavez Secretario d'Euskaltzaindia.

Lo día 19 d'aviento de 2009, lo pleno de l'Academia ye informau d'a renuncia personal de Pilar Benítez Marco y d'Óscar Latas Alegre, que causan baixa como miembos de l'Academia. En abril de 2010, Carlos Abril Carceller renuncia a la condición de miembro de l'ACAR.

Lo día 4 de marzo de 2010 se va producir a gran perda de l'academica d'honor chistabina Nieus-Lucia Dueso Lascorz. En paz discanse.

L'11 d'aviento de 2010, lo pleno accepta las renuncias personals de Manuel Marqués Franco y de Rafel Vidaller Tricas.

En aviento de 2012 se van nombrar es primers miembros correspondients, un total de seis personas con importants meritos: Miguel Ánchel Barcos, Juan Pablo Martínez, Santiago Paricio, Chorchi Díaz, Mª Teresa Moret y Guillermo Tomás Faci. Istos correspondients pasoron a estar numerarios en 2014.

En octubre de 2019 causan baixa de l’asociación Chusé Gimeno Aragüés, Roberto Serrano Lacarra y Ana Tena Puy.

En chunyo de 2021 lo pleno ye informau d'a renuncia de Juan José Segura como miembro numerario y apreba unanimement lo suyo nombramiento como miembro d'honor.

En o pleno extraordinario de l'uno d'octubre de 2022 dentran como miembros numerarios Fernando Blas Gabarda, Rubén Ramos Antón y Lois Chabier Tejada Francia.

En o pleno extraordinario de vintiún d'octubre de 2023 dentran como miembros numerarios Lucia López Marco y Dabi Lahiguera Albericio.